نرخی گۆشتی سوور و مریشک دابەزی
بەهامیدیا
نرخی گۆشت و مریشک لە هەرێمی كوردستان و عێراق ڕووی لە هەرزانبوون كردووە و پێشبینیش دەکرێت لە ڕۆژانی داهاتوو زیاتر دادەبەزێت.
نرخی گۆشتی سوور لەگەڵ 50 رۆژ پێش ئێستا، نزیكەی چوار هەزار دینار دابەزینی بەخۆیەوە بینیوە، لەلایەن حكوومەتەوە كۆمەڵێك رێكار گیرایەبەر وەك كەمكردنەوەی باج و رێگەدان بە هاوردە و كۆمەڵێك بڕیاری تر، ئەمەیش وایكرد نرخەكەی دابەزین تۆمار بكات.
مەهدی ساهر یاریدەدەری ئەمینداری كارگێڕی وەزارەتی كشتوكاڵی عێراق رایگەیاند، كار بۆ دابینكردنی گۆشتی سوور و رێگری لە بەرزبوونەوەی نرخەكانی لە بازاڕە ناوخۆییەكان و دابینكردنی خواستی ناوخۆیی دەكەن.
باسی لەوەش كرد، نرخی گۆشتی سوور تا ئاستێك سەقامگیریی بەخۆیەوە بینیوە، لە داهاتوودا پێشبینی دابەزینی زۆری نرخەكەی دەكرێت و بەهۆی زۆریی هاوردەكردنەوە، دەتوانێت خواستی بازاڕ پڕ بكاتەوە.
روونیشی كردەوە، ئێستا دەرگای هاوردەكردنی ئاژەڵیان بەمەبەستی گۆشتەكەی و بەخێوكردنیش كردووەتەوە، جگە لە هاوردەكردنی گۆشت لە وڵاتانی دنیاوە، بەو مەرجەی وڵاتەكە ئەندامی رێكخراوی تەندروستیی جیهانی بێت.
|